Eph 4 | KhmKCB | STEP | ដូច្នេះ ខ្ញុំ ជា អ្នកទោស ក្នុង ព្រះអម្ចាស់ សូម ដាស់តឿន អ្នករាល់គ្នា ឲ្យ រស់នៅ ស័ក្តិសម នឹង ការ ត្រាស់ហៅ ដែល អ្នករាល់គ្នាបាន ទទួល

Ephesians 4

1 ដូច្នេះខ្ញុំជាអ្នកទោសក្នុងព្រះអម្ចាស់សូមដាស់តឿនអ្នករាល់គ្នាឲ្យរស់នៅស័ក្តិសមនឹងការត្រាស់ហៅដែលអ្នករាល់គ្នាបានទទួល 2 ដោយការបន្ទាបខ្លួននិងចិត្ដស្លូតបូតគ្រប់យ៉ាងដោយសេចក្ដីអត់ធ្មត់ហើយទ្រាំទ្រគ្នាទៅវិញទៅមកនៅក្នុងសេចក្ដីស្រលាញ់ 3 ទាំងព្យាយាមរក្សាភាពតែមួយដែលមកពីព្រះវិញ្ញាណដោយចំណងនៃសេចក្ដីសុខសាន្ត។ 4 មានរូបកាយតែមួយព្រះវិញ្ញាណតែមួយដូចដែលអ្នករាល់គ្នាបានទទួលការត្រាស់ហៅមកក្នុងសេចក្ដីសង្ឃឹមតែមួយនោះដែរ 5 មានព្រះអម្ចាស់តែមួយជំនឿតែមួយពិធីជ្រមុជតែមួយ 6 ព្រះជាម្ចាស់តែមួយជាព្រះវរបិតានៃទាំងអស់ដែលខ្ពស់លើទាំងអស់ហើយធ្វើការតាមរយៈទាំងអស់ព្រមទាំងគង់នៅក្នុងទាំងអស់ 7 តែម្នាក់ៗបានទទួលព្រះគុណតាមខ្នាតនៃអំណោយទានរបស់ព្រះគ្រិស្ដរៀងៗខ្លួន។ 8 ហេតុនេះហើយបានជាមានសេចក្ដីចែងទុកថានៅពេលព្រះអង្គយាងឡើងទៅស្ថានដ៏ខ្ពស់ព្រះអង្គបានចាប់ពួកឈ្លើយយកទៅហើយព្រះអង្គបានប្រទានអំណោយទានដល់មនុស្ស។ 9 តើពាក្យយាងឡើងទៅមានន័យដូចម្ដេច? តើព្រះអង្គមិនបានយាងចុះទៅឯស្ថានដែលទាបជាងផែនដីទេឬអី? 10 ព្រះអង្គដែលបានយាងចុះក៏ជាព្រះតែមួយដែរដែលបានយាងឡើងទៅខ្ពស់លើអស់ទាំងស្ថានសួគ៌ដើម្បីឲ្យព្រះអង្គអាចបំពេញគ្រប់ការទាំងអស់បាន។ 11 ព្រះអង្គបានប្រទានឲ្យអ្នកខ្លះធ្វើជាសាវកអ្នកខ្លះជាអ្នកនាំព្រះបន្ទូលអ្នកខ្លះជាអ្នកប្រកាសដំណឹងល្អអ្នកខ្លះទៀតជាគ្រូគង្វាលនិងជាគ្រូបង្រៀន 12 ដើម្បីឲ្យពួកបរិសុទ្ធបានគ្រប់លក្ខណ៍សម្រាប់កិច្ចការបម្រើនិងការស្អាងរូបកាយរបស់ព្រះគ្រិស្ដ 13 រហូតទាល់តែយើងទាំងអស់គ្នាមានភាពតែមួយនៅក្នុងជំនឿនិងការស្គាល់ព្រះរាជបុត្រារបស់ព្រះជាម្ចាស់ទាំងត្រលប់ជាមនុស្សពេញវ័យហើយដល់ខ្នាតកំពស់នៃសេចក្ដីពោរពេញរបស់ព្រះគ្រិស្ដ។ 14 ដូច្នេះយើងមិនត្រូវនៅជាទារកទៀតឡើយយើងមិនត្រូវឃ្លេងឃ្លោងហើយរសាត់ចុះឡើងតាមខ្យល់នៃសេចក្ដីបង្រៀនគ្រប់បែបយ៉ាងនិងតាមឧបាយកលរបស់មនុស្សដែលមានល្បិចប៉ិនប្រសប់ក្នុងការបោកប្រាស់ 15 ផ្ទុយទៅវិញចូរយើងនិយាយសេចក្ដីពិតនៅក្នុងសេចក្ដីស្រលាញ់ហើយចូរចម្រើនឡើងក្នុងគ្រប់ការទាំងអស់ឲ្យដល់ព្រះអង្គដែលជាព្រះសិរគឺជាព្រះគ្រិស្ដ 16 ដែលបានផ្គុំនិងភ្ជាប់រូបកាយទាំងមូលឡើងដោយសារសន្លាក់ទាំងអស់ដែលទ្រទ្រង់ស្របទៅតាមកម្រិតសមត្ថភាពរៀងៗខ្លួនរបស់ផ្នែកនិមួយៗដែលធ្វើឲ្យរូបកាយចម្រើនឡើងដើម្បីនឹងស្អាងរូបកាយនោះឡើងនៅក្នុងសេចក្ដីស្រលាញ់។ 17 ដូច្នេះហើយខ្ញុំនិយាយសេចក្ដីនេះទាំងធ្វើបន្ទាល់នៅក្នុងព្រះអម្ចាស់ថាអ្នករាល់គ្នាកុំរស់នៅដូចជាសាសន៍ដទៃដែលរស់នៅតាមគំនិតឥតប្រយោជន៍របស់ពួកគេទៀតឡើយ 18 គំនិតរបស់ពួកគេត្រូវបានធ្វើឲ្យងងឹតសូន្យសុងហើយបានដាច់ចេញពីព្រះជន្មរបស់ព្រះជាម្ចាស់ដោយសារភាពល្ងង់ខ្លៅដែលមាននៅក្នុងពួកគេនិងដោយសារចិត្ដរឹងរូសរបស់ពួកគេ។ 19 ពួកគេលែងដឹងខុសត្រូវហើយបណ្ដោយខ្លួនទៅតាមការល្មោភកាមដើម្បីប្រព្រឹត្តសេចក្ដីស្មោកគ្រោកគ្រប់បែបយ៉ាងដោយមិនចេះស្កប់ស្កល់ឡើយ 20 ប៉ុន្តែអ្នករាល់គ្នាមិនបានរៀនអំពីព្រះគ្រិស្ដដូច្នោះទេ 21 អ្នករាល់គ្នាពិតជាបានឮអំពីព្រះអង្គនិងបានទទួលការបង្រៀនក្នុងព្រះអង្គដែលស្របទៅតាមសេចក្ដីពិតក្នុងព្រះយេស៊ូហើយ 22 គឺឲ្យអ្នករាល់គ្នាដោះមនុស្សចាស់ចោលជាកិរិយាកាលពីមុនដែលត្រូវបំផ្លាញដោយចំណង់តណ្ហាបោកបញ្ឆោត 23 ហើយឲ្យគំនិតនិងវិញ្ញាណរបស់អ្នករាល់គ្នាបានកែជាថ្មីឡើងវិញ 24 ទាំងពាក់មនុស្សថ្មីដែលត្រូវបានបង្កើតឡើងដូចព្រះជាម្ចាស់ដែលមានសេចក្ដីសុចរិតនិងសេចក្ដីបរិសុទ្ធរបស់សេចក្ដីពិត។ 25 ដូច្នេះកាលបានដោះសេចក្ដីភូតភរចោលហើយចូរយើងម្នាក់ៗនិយាយសេចក្ដីពិតទៅកាន់អ្នកជិតខាងរបស់ខ្លួនដ្បិតយើងជាអវយវៈរបស់គ្នាទៅវិញទៅមក។ 26 ចូរខឹងចុះប៉ុន្ដែកុំធ្វើបាបឡើយចូរកុំឲ្យកំហឹងរបស់អ្នករាល់គ្នានៅរហូតដល់ថ្ងៃលិច 27 ក៏កុំឲ្យឱកាសដល់អារក្សសាតាំងឲ្យសោះ។ 28 អ្នកដែលលួចចូរកុំលួចទៀតប៉ុន្ដែចូរខំធ្វើការយ៉ាងនឿយហត់ចុះគឺធ្វើការដែលមានប្រយោជន៍ដោយដៃរបស់ខ្លួនវិញដើម្បីឲ្យមានអ្វីចែកដល់អ្នកដែលខ្វះខាត។ 29 កុំឲ្យមានពាក្យអាក្រក់ណាចេញពីមាត់អ្នករាល់គ្នាឡើយផ្ទុយទៅវិញត្រូវនិយាយពាក្យល្អៗសម្រាប់ការស្អាងចិត្ដតាមដែលត្រូវការដើម្បីផ្ដល់ព្រះគុណដល់អស់អ្នកដែលស្ដាប់។ 30 កុំធ្វើឲ្យព្រះវិញ្ញាណបរិសុទ្ធរបស់ព្រះជាម្ចាស់ព្រួយព្រះហឫទ័យឡើយដ្បិតអ្នករាល់គ្នាទទួលបានការបោះត្រាដែលជាព្រះវិញ្ញាណបរិសុទ្ធសម្រាប់ថ្ងៃនៃសេចក្ដីប្រោសលោះ។ 31 ចូរដកយកអស់ទាំងសេចក្ដីជូរចត់កំហឹងចិត្ដក្ដៅក្រហាយជម្លោះឡូឡាការជេរប្រមាថរួមទាំងសេចក្ដីអាក្រក់គ្រប់ប៉ែបយ៉ាងចេញពីអ្នករាល់គ្នាចុះ 32 ចូរមានចិត្ដសប្បុរសចំពោះគ្នាទៅវិញទៅមកនិងមានចិត្ដអាណិតអាសូរព្រមទាំងលើកលែងទោសឲ្យគ្នាទៅវិញទៅមកដូចដែលព្រះជាម្ចាស់បានលើកលែងទោសឲ្យអ្នករាល់គ្នានៅក្នុងព្រះគ្រិស្ដដែរ។